Deputetja e Grupit Parlamentar të Lëvizjes Vetëvendosje, Jeta Statovci ka thënë se refuzimi i Lidhjes Demokratike të Kosovës për takim me kryeministrin në detyrë para seancës të së enjtes është joinstitucionale dhe joserioze.

Ajo ka thënë se veprimet e LDK-së po bëhen nga inati që sipas saj është pasojë e rezultatit të zgjedhjeve të 9 shkurtit.

Statovci në teve1 ka thënë LDK dëshpërimin e tyre po e shpërfaqin ndaj tërë spektrin politik.

“Aspak institucionale dhe joserioze në kuadër të interesit të përgjithshme që ka vendi dhe interesit të kohës dhe nevojave qytetare. LDK-ja është zhytur në inate pas rezultatit të zgjedhjeve që ka marrë, sepse e ka proklamuar veten edhe si fituese e zgjedhjeve dhe ka përfunduar e treta që e bënë atë me një humbje të thellë karshi pritjeve të saj. Dëshpërimi i tyre është i thellë dhe këtë po e manifestojnë me një inat dhe këtë qasje destruktive e kanë ndaj të gjithë spektrit politik”, ka thënë ajo.

Sa i përket seancës së nesërme Statovci ka thënë se mbetet optimiste duke thënë se ata nuk ndryshojnë qëndrim për kandidaturën.