Drejtoresha e Shërbimit Informativ të Shqipërisë, Vlora Hyseni, ka zhvilluar një vizitë zyrtare në Washington, ku është takuar me John Ratcliffe, Drejtorin e Agjencisë Qendrore të Inteligjencës në ShBA si dhe Tulsi Gabbard, Drejtoreshën e Intelegjencës Kombëtare të ShBA’së. Hyseni është bërë kështu zyrtarja e parë shqiptare që ka zhvilluar takime zyrtare me adminitratën Trump, shkruan Reporteri.net.

Vizita e saj është zhvilluar nga 15 deri më 17 maj.

“Në takimin me z. John Ratcliffe, Drejtorin e Agjencisë Qendrore të Inteligjencës së SHBA, u diskutuan një sërë çështjesh të bashkëpunimit dypalësh, ku u theksua partneriteti i shkëlqyer me SHISH në interes të identifikimit dhe parandalimit të kërcënimeve të përbashkëta. U shkëmbyen vlerësime mbi situatën e sigurisë rajonale dhe ndërkombëtare, u diskutua mbi thellimin e bashkëpunimit, si dhe rritjen e kapaciteteve të inteligjencës”, thuhet në njoftimin e lëshuar nga SHISH për takimin e Hysenit me Ratcliffe.

Ndërkohë, në takimin me Gabbard thuhet se u shkëmbyen vlerësime mbi zhvillimet me impakt në sigurinë rajonale e ndërkombëtare.

“Në takimin me znj.Tulsi Gabbard, Drejtoreshën e Inteligjencës Kombëtare të SHBA, u diskutuan çështje të bashkëpunimit dhe sfidat në fushën e inteligjencës e sigurisë, me interes për sigurinë kombëtare të dy vendeve tona. U shkëmbyen vlerësime mbi zhvillimet me impakt në sigurinë rajonale e ndërkombëtare, angazhimin konstruktiv e konkret për sigurinë kolektive, duke konsideruar SHISH si partner të besueshëm dhe Shqipërinë si faktor stabiliteti në rajon”, thuhet në njoftim.

Hyseni më parë ka mbajtur pozitën e zëvendësdrejtoreshës së Agjencisë Kosovare për Inteligjencë, mirëpo ishte shkarkuar nga kjo pozitë në qershor të vitit 2021./Reporteri.net

Kush është Vlora Hyseni që Vjosa Osmani dhe Albin Kurti e shkarkuan nga pozita e zv/drejtoreshës së AKI-së?