As në përpjekjen e 28-të nuk u arrit që të konstituohet Kuvendi i Kosovës, pasi as sot nuk mori votat e mjaftueshme komisioni për të organizuar votimin e fshehtë për zgjedhjen e kryetarit të Kuvendit, shkruan Reporteri.net.

Si edhe herave të kaluara deputetët u vonuan dhe seanca nisi me vonesë, por kur ajo filloi nga kryesuesi i seancës, Avni Dehari”, nuk zgjati as tre minuta. U ndërpre, për të vazhduar pas 48 orëve, por pa marrëveshje mes partive që mund t’i jepte fund ngërçit politik të krijuar në vend.

Edhe sot deputetët e partisë së dytë në vend, PDK-së, dhe asaj të tretë, LDK-së, adresuan kritika në drejtim të Lëvizjes Vetëvendosje dhe Albin Kurtit për krizën e shkaktuar, si dhe për deklaratën që bëri dje se deputetëve ” rrogat po ju ecin”, shkruan Reporteri.net.

Për këtë deklaratë që dha dje Kurti, sot atij i reaguan deputetët Mërgim Lushtaku nga PDK dhe Armend Zemaj nga LDK.

Lushtaku i PDK-së tha se rrogat iu ecin edhe qeveritarëve.

“Rroga i ec edhe deputetëve edhe qeverisë, lluksi i qeverisë po ec me shumë se çdo send”.