Ministri në detyrë i Kulturës, Rinisë dhe Sportit, Hajrullah Çeku, e ka shpërblyer me një bursë në vlerë hiq më pak se prej 14 mijë e 100 Euro,  Dorina Deçanin, ish-anëtare e kabinetit të tij.

Sipas listës preliminare të siguruar nga Reporteri.net, Deçani është përfituese e bursës për studime master në fushën e Menaxhimit të Artit dhe Kulturës në Rome Business School në Itali.

Gazeta online Reporteri.net ka arritur ta konfirmojë se Deçani ka qenë e angazhuar në kabinetin e ministrit Çeku deri të paktën gjashtë muaj më parë.

Në të njëjtën listë preliminare figuron edhe emri i Yll Rugovës, i cili ka përfituar një bursë prej 5,760 euro për studime doktorale në Universitetin e Leuvenit në Belgjikë. Rugova është pjesë e Këshillit Inicues të Artit Bashkëkohor që funksionon në kuadër të së njëjtës ministri.

Bursat janë ndarë në kuadër të thirrjes publike “Për ngritjen e kapaciteteve profesionale të profesionistëve të rinj nëpërmjet mbështetjes financiare studimore në fushën e Kulturës, Trashëgimisë Kulturore dhe Sportit për vitin 2025”./Reporteri.net.