Policia e Kosovës ka njoftuar se më 9 qershor, rreth orës 06:00 të mëngjesit, në rrugën “Mursel Osmanaj” në Prizren, një 30-vjeçar është sulmuar fizikisht nga dy persona të panjohur, shkruan Reporteri.net.

Rasti është raportuar dy ditë më vonë, më 11 qershor, në ora 11:50, nga viktima M.M., banues në Prizren. Sipas deklarimit të tij, autorët e dyshuar ishin me motoçikletë dhe mbanin helmeta në kokë, gjë që e ka vështirësuar identifikimin e tyre.

Hetuesit e Stacionit Policor në Prizren kanë siguruar pamje video të incidentit dhe janë duke punuar për identifikimin e të dyshuarve dhe sqarimin e motivit të sulmit.

Policia fton qytetarët që kanë informacione lidhur me rastin të ndihmojnë në zbardhjen e tij.

Komunikata:

Lëndim i rëndë trupor me datë 9 qershor 2025 afër parkut në Prizren

Prizren, 17 qershor 2025

Policia e Kosovës, Drejtoria Rajonale në Prizren, njofton opinionin publik se më datë 11.06.2025, në ora 11:50, është raportuar rasti “Lëndim i rëndë trupor” nga qytetari M.M., mashkull, 30 vjeç, banues në Prizren.

Sipas ankuesit, rasti ka ndodhur më 09.06.2025, rreth orës 06:00 të mëngjesit në rrugën “Mursel Osmanaj” në Prizren, ku i njëjti është sulmuar fizikisht nga dy persona të panjohur. Sipas deklarimeve të viktimës, të dyshuarit ishin me një motoçikletë dhe të pajisur me helmeta në kokë, çka ka vështirësuar identifikimin e tyre.

Hetuesit e Stacionit Policor në Prizren kanë arritur të sigurojnë pamje video të incidentit dhe të personave të dyshuar, dhe janë duke punuar intensivisht në identifikimin e tyre si dhe në sqarimin e motivit të mundshëm të këtij rasti.

Policia e Kosovës inkurajon qytetarët që posedojnë informacione relevante për këtë rast të kontaktojnë organet e rendit për të ndihmuar në zbardhjen sa më të shpejtë dhe të saktë të tij.

Policia e Kosovës mbetet e përkushtuar për garantimin e sigurisë publike dhe hetimin e rasteve me profesionalizëm dhe transparencë.