Deputeti i VV-së, Hekuran Murati para fillimit të seancës konstituive tha se s’ka marrëveshje politike me opozitën.
Madje ai theksoi se nuk e kanë një të tillë që me ua zgjat mandatin opozita.
“Për besë nuk kemi marrëveshje me opozitën që me na zgjatë kaq shumë mandatin. S’di pse”, tha ai.
/Reporteri.net/
E propozuara Vetëvendosjes për kryeparlamentare, Albulena Haxhiu ka thënë se do ta respektojnë vendimin e Kushtetueses për kërkesën për vlerësimin e kushtetutshmërisë së ndryshimit të mënyrës së votimit për zgjedhjen e kryetarit të Kuvendit të Kosovës.
Haxhiu tha se partitë që në legjislaturën e kaluar ishin në opozitë, po ia zgjasin mandatin qeverisë në detyrë duke pamundësuar konsituimin e Kuvendit, që më pas do të hapte rrugë për formimin e qeverisë.
Ajo tha se shpreson që Kushtetuesja të dalë sa më parë me një vendim
“Me mungesën e vullnetit për të konstituuar Kuvendin, opozita po e zgjat mandatin tonë. Ju e dini që ne në mars e kemi mbyllur mandatin tonë dhe jemi qeveri në detyrë, por është e rëndësishme të konstituohet Kuvendi që të fillojnë afatet për formimin e Qeverisë. Gjatë kësaj kohe në vend se të kishim një përpjekje edhe nga ana e deputetëve të opozitës, madje edhe kryetarëve të partive opozitare, ne kemi parë që vijnë dhe nuk votojnë fare. Pse vijnë? Nuk ka kuptim të vish në seancë për 29 herë prej kur ka filluar propozimi për votim të fshehtë, dhe nuk kanë marrë fare pjesë në votim. Ne nuk kemi marrëveshje me ta, por këta po e zgjasin mandatin e qeverisë, e në anën tjetër përditë flasin kundër qeverisë, duket se as vetë nuk u besojnë fjalëve të tyre.
Urojmë që vendimi i Kushtetueses të dalë sa më parë. Ne do ta respektojmë, por nuk mundet që vetëm një parti politike me e respektu vendimin e Kushtetueses.
Ditën e sotme Kuvendi i Kosovës ka dështuar të konstituohet për herë të 37-të me radhë. Seanca zgjati vetëm 1 minutë e 55 sekonda. Edhe kësaj radhe Komisioni për Votimin e fshehtë nuk kaloi.
Nga deputetët e pranishëm në sallë, vetëm 52 prej tyre votuan për.
Kundër dhe abstenim s’kishte. Seanca e radhës është caktuar pas 28 orëve. /Reporteri.net/
Deputetja e PDK-së, Vlora Çitaku pas dështimit të seancës konstituive ka thënë se kjo situatë bllokuese është e papranueshme, shkruan Reporterinet.
E krejt kjo sipas Çitakut po ndodh për shkak të kryeneçësisë së VV-së dhe Albin Kurtit.
Ajo madje i bëri thirrje Kurtit për reflektim, pasi siç tha ajo Kosova është më e madhe se ego e tij.
“Kjo gjendje, kjo situatë është tërësisht e papranueshme. Në këtë pikë të bllokadës jemi si rezultatat i kryeneçësisë së VV-së dhe Kurtit. Madje dëgjojmë deklarime qesharake, se gjoja i kanë numrat për qeveri, e s’i paskan numrat për Kryeparlamanetar. Kjo situatë nuk do koment. Është papërgjegjësi. I bëjmë thirrje kryetarit të VV-së që të reflektojë. Kosova është shumë më e madhe se egoja e tij”, tha Çitaku.
/Reporteri.net/
Përfaqësues të shoqërisë civile kanë protestuar sot para Kuvendit si shenjë pakënaqësie me bllokadën mbi dy muaj në Kuvend, shkruan Gazeta Online Reporteri.net.
Eugen Cakolli nga KDI ka thënë se situata ka kaluar të gjithë kufijtë e normalës, dhe se deputetëve nuk po u bëhet vonë.
Sipas tij, Kuvendi është shndërruar në cirk, por që pagat për dy minuta punë po ju ecin deputetëve.
“Kjo situatë kjo i ka kaluar të gjithë kufijtë e normales dhe është bërë boll. Të vetmëve që nuk po u bëhet vonë janë deputetët e Kuvendit. Me papërgjegjësi po e trajtojnë situatën aktuale si të zakonshme, ndonëse nuk është e tillë. Kuvendi është shndërruar në një cirk, ku çdo 48 orë mblidhen për pak minuta punë, ndonëse pagat po ju ecin”, tha ai.
Ai shpreson se deputetët do t’i arrijnë një marrëveshje politike, ndërsa shtoi se as Gjykata Kushtetuese s’ka për ta zgjidhur këtë ngërç, pasi siç tha ai mungon vullneti politik.
“Besojmë që është koha e fundit që deputetët ti thërrasin arsyes dhe të njëjtit të arrijnë të kenë një marrëveshje politike e cila është përgjegjësi e partisë fituese në mënyrë që kjo krizë të marrë fund.
“Qëndrimi jonë është që as Gjykata Kushtetutese nuk mund ta zgjidh këtë ngërç, pasi problemi është mungesa e vullnetit politik. Edhe po të ketë vendim të Gjykatës, prap do duhet që deputetët të tregojnë vullnet politik për të tejkaluar inatet e tyre e që barrën e kanë liderët e partive poltike”, tha ai.
/Reporteri.net/
Deputetja e Lëvizjes Vetëvendosje, Adriana Matoshi, ka kritikuar opozitën për mospjesëmarrje në votim në Kuvend, shkruan Gazeta Oonline Reporteri.net.
Madje duke ironizuar ajo ka thënë se po i dhimbsen që po ju shkon “fenirimi huq”.
“Po e shihni edhe vetë situatën. Çfarë deklarate me jap? Na po vijmë, po votojmë. Opozita po vjen, s’po voton. Kush është këtu fajtor? Veç po ju shkon fenirimi huq,” deklaroi Matoshi para mediave.
/Reporteri.net/
Përfaqësues të shoqërisë civile po protestojnë para objektit të Kuvendit, në prag të nisjes së seancës, ku për herë të 37-të do të tentohet konstituimi i Kuvendit të Kosovës.
Ata kanë shprehur pakënaqësi në lidhje me bllokadën institucionale.
Protestuesit po mbajnë pankarta me mbishkrimin “Deri kur?”, “A doni me shku edhe në deti?”, e “S’ka pushime pa arritë marrëveshje”, shkruan gazeta online Reporteri.net.
Seanca e sotme e Kuvendit të Kosovës pritet të nisë në ora 11:00. /Reporteri.net/
Deputetët do të mblidhen sërish nesër në një përpjekje të re, të 35’ën me radhë, për ta konstituar Kuvendin. Procesi ka ngecur tek zgjedhja e Kryetarit të Kuvendit. VV ka propozuar për këtë pozitë Albulena Haxhiun, që nga partitë tjera po konsiderohet figurë përçarëse, shkruan Reporteri.net.
Pas disa dështimesh për zgjedhjen e saj, tash e disa javë po mundohet ta ndryshojë formën e votimit për zgjedhjen e saj, në të fshehtë. Partitë tjera janë kundër.
PDK, LDK, AAK dhe Lista Serbe s’kanë propozuar fare anëtarë për Komisionin për votim të fshehtë.
Sa herë që ky Komision hidhet në votim, dështon kalimi në mungesë kuorumi.
“Me 53 vota për, një kundër dhe asnjë abstenim, Kuvendi nuk pati kuorum për vendimmarrje”, ishte rezultati i seancës së fundit.
Edhe nesër pritet situatë e njëjtë. Seanca do të nis në orën 11:00.
Nënkryetarja dhe deputetja e Lidhjes Demokratike të Kosovës, Hykmete Bajrami, ka thënë sonte se janë lodhur duke ia lëshuar rrugën kryeministrit në detyrë, Albin Kurtit.
Bajrami ka thënë se Kurti dhe Lëvizja Vetëvendosje po sillen me logjikën e votave që kanë marrë në zgjedhjet e 2021’ës., shkruan Reporteri.net.
“Jemi lodhur duke ia lëshuar rrugën Albin Kurtit dhe ai duke u bërë shkelës i vazhdueshëm i Kushtetutës dhe ligjeve dhe përdhosës i institucioneve të Kosovës”, ka deklaruar Bajrami.
Bajrami tha se po të ishte LDK në pozitën e VV’së, deri tani institucionet do të konstituoheshin.
“Ata paradite shajnë dhe ofendojnë…pasdite dërgojnë letra për bashkëpunim”, shtoi Bajrami./Reporteri.net
Reporteri.net është gazetë online e lajmeve nga vendi dhe bota. Qëllim kryesor ka informimin e drejtë, të paanshëm dhe të shpejtë. Reporteri.net, në pronësi të “R Media L.L.C.”, është themeluar në mars të vitit 2019 dhe drejtohet nga gazetarët Bekim Kabashi dhe Mentor Gjergjaj.
E-Mail: info@reporteri.net
Marketing: marketing@reporteri.net
Adresa: Rr. UÇK, Nr. 102/11 10000 Prishtinë, Kosovë
