Themeluesi i “Sunny Hill Foundation”, Dukagjin Lipa u ka dërguar porosi të gjithë atyre që po kërkojnë bileta falas për festivalin “Sunny Hill”.
Duke kritikuar të gjithë ata që po shpenzojnë para të majme jashtë Kosovës, Lipa, njëherësh organizator i festivalit bashkë më bijën, këngëtaren Dua Lipa, ka bërë me dije se nuk ka bileta “belesh” për të dhënë.
“Krejt ju që po lypni bileta falas, asnjë prej juve nuk jeni rast social. Përkundrazi, çdo të premte u hipni veturave e aeroplanëve për Evropë, për qejf, eksportoni kesh jashtë Kosovës (shuma të konsiderueshme), e me ble bileta për me e kalu një vikend në Kosovë, që asnjë prej qyteteve evropiane nuk iu ofron kësisoj, qenka shpenzim për ju” u shpreh Lipa.
Ai përmendi organizimet e tilla në Evropë, për të cilat pjesëmarrësit nuk i kanë falas as biletat, as udhëtimin, as akomodimin e as ushqimin, duke i porositur të gjithë që të mos e kontaktojnë as për bileta “belesh”, as për bileta VIP.
Ngjarja më e madhe kulturore në vend sivjet do të jetë tri netë radhazi, me datat: 1,2 dhe 3 gusht.
