Nënkryetari i AAK-së, Daut Haradinaj, ka deklaruar se ai personalisht nuk do të votojë për Glauk Konjufcën, megjithatë tha se do të konsultohet me partinë e tij dhe do të dalin me një qëndrim të përbashkët.

Haradinaj e shprehu vlerësimin e tij për Konjufcën, duke thënë se ka shumë respekt për të si njeri dhe për angazhimin e tij si aktivist, por shtoi se nuk mund të mbështesin një qeveri që nuk i ka informuar rreth planeve dhe veprimeve të saj.

Haradinaj tha se AAK nuk ka qenë pengesë për miratimin e buxhetit.

“Unë të jem i sinqertë kam shumë respekt për Glaukun edhe si djalë, kohën kur ka shërby si aktivist, nuk po e them si metaforë si familje dhe si njeri. Jemi t’u fol për ekzekutivin, me gjithë respektin që e kemi ne jemi të injoruar total prej ditës që ka përfundu seanca e sotme, nuk ka pasë asnjë komunikim asnjë tendencë, nga kushdokoftë, qoftë edhe me na informu se çfarë po ndodh”, tha Haradinaj në Klan Kosova.

Ndryshe, Presidentja Vjosa Osmani e mandatoi sot Konjufcën për kryeministër.