Këngëtari i njohur Shemsi Krasniqi- Shemi i grupit “Ilirët”, është gjetur i vdekur. 

Lajmin e kanë bërë të ditur burime të Gazetës Online Reporteri.net. Ndërkohë, edhe Policia e Kosovës e ka konfirmuar raportimin.

Zëdhënësi i Policisë së Kosovës për rajonin e Prishtinës, Enis Pllana, ka bërë të ditur se policia është njoftuar për rastin rreth orës 15:00. Sipas tij, pas pranimit të informacionit, njësitë policore kanë dalë menjëherë në vendin e ngjarjes.

“Rreth orës 15:00 kemi pranuar informatën për një person pa shenja jete në një banesë në rrugën UÇK në Prishtinë. Me të marrë njoftimin, policia ka dalë në vendin e ngjarjes, ku ekipi mjekësor ka konstatuar vdekjen e viktimës, mashkull” ka deklaruar Pllana.

Shemsi Krasniqi, i njohur me nofkën Shemi, ishte këngëtar dhe vokalisti i grupit muzikor rock “Ilirët”, një nga grupet më të njohura shqiptare që ka lënë gjurmë të mëdha në skenën muzikore të Kosovës

Shemi u bë i njohur kryesisht si zëri dhe figura kryesore e grupit Ilirët, i cili u formua në vitet 1980 dhe u bë i dashur për publikun për stilin rock-folk dhe këngët që shpesh pasqyronin temat sociale dhe identitare të shqiptarëve.