Vedat Muriqi vazhdon të shkëlqejë në Superligën turke duke qenë protagonist kryesor i suksesit të gjigantit Fenerbahce.

Ai kaloi një vit fantastik sezonin e kaluar me skuadrën e Rizesporit duke shënuar e dhuruar asiste me figura të dyfishta, ndërsa edhe këtë sezon po bën boom me skuadrën e re, shkruan Reporteri.net

Ai shënoi edhe mbrëmë në ndeshjen të cilën Fenerbahce e fitoi me rezultat minimal 1-2 ndaj Denizilisporit dhe ishte vendimtar për skuadrën me kontributin e dhënë në të gjitha repartet e fushës.

Muriqi ishte futbollisti i dytë që vrapoi më së shumti pas Gustavos.

Sulmuesi prizrenas vrapoi hiç më pak se 10.888 metra, vetëm 410 metra më pak sesa bashkëlojtari i tij Luis Gustavo.

Ky fakt e bën atë njërin ndër sulmuesit më të mirë ekiporë për shkak të kontributit që jep në çdo repart të fushës.

Kujtojmë që Muriqi po shkëlqen edhe me kombëtaren e Kosovës, ku ka arritur të shënojë plotë 3 herë deri më tani./Reporteri.net/