Bartshmëria e numrave të telefonisë mobile në Kosovë po zhvillohet pa vështirësi që nga nisja e zbatimit më 5 tetor 2026, sipas Autoritetit Rregullativ të Komunikimeve Elektronike dhe Postare (ARKEP).
ARKEP ka konfirmuar se numri i bartjeve të realizuara deri më 22 tetor, në orën 14:00, është gjithsej 2,300.
Prej tyre, rreth 2,200 numra janë bartje nga IPKO drejt Valës, ndërsa nga Vala drejt IPKO-s janë bartur rreth 100 numra.
Rregullatori ka bërë të ditur se bartshmëria aktualisht zbatohet vetëm ndërmjet Telekomit të Kosovës (Vala) dhe IPKO-s, ndërsa numrat e operatorit mts D.O.O. nuk mund të barten drejt këtyre dy operatorëve apo anasjelltas.
Sipas ARKEP-it, shërbimi zbatohet vetëm ndërmjet operatorëve të rrjeteve mobile që posedojnë autorizime individuale nga ky autoritet dhe që kanë qenë pjesë e projektit të bartshmërisë që nga fillimi, përkatësisht Telekomit të Kosovës dhe IPKO-s
“Rrjedhimisht, në kuadër të këtij procesi, nuk është përfshirë dhe nuk mund të realizohet bartja e numrave nga operatori mts D.O.O. drejt këtyre dy operatorëve apo anasjelltas”, thuhet në përgjigjet e ARKEP-it për Buletini Ekonomik.
Nga ky institucion kanë sqaruar veçmas se numrat me prefiksin 047, të alokuar për operatorin mts D.O.O., aktualisht nuk mund të barten drejt Valës ose IPKO-s për shkak të kufizimeve në mënyrën e operimit të këtij operatori, përfshirë kufizimet infrastrukturore dhe territoriale që burojnë nga konteksti i zbatimit të marrëveshjeve të Brukselit.
Megjithatë, ARKEP-i nuk ka specifikuar se kur këto kufizime mund të tejkalohen apo nëse ekziston një afat për përfshirjen e numrave të mts D.O.O. në sistemin e bartshmërisë.
Zbatimi i bartshmërisë së numrave nisi më 5 tetor të këtij viti, duke iu mundësuar konsumatorëve të kalojnë nga një operator te tjetri duke ruajtur numrin ekzistues.
Me funksionalizimin e këtij shërbimi, prefikset telefonike nuk janë më tregues i sigurt se te cili operator është i regjistruar një numër, pasi konsumatorët mund ta bartin atë te një operator tjetër.
