Kur u bën fiks 1 muaj nga dita e zgjedhjeve, Qendra për Numërim dhe Rezultate ka numëruar votat e fundit që u hodhën për garën e 6 tetorit.

Të fundit që mbetën për t’u numëruar sonte, ishin votat e shumëkontestuara nga diaspora, shkruan Reporteri.net.

E nga këto 1992 vota, VV-ja ka dalë e para me 1154 vota, ndërkaq e dyta është LDK-ja me 395 vota.

Sikur edhe rezultati i përgjithshëm i zgjedhjeve, edhe në këto kuti si parti e tretë doli PDK-ja me 276 vota, ndërkohë që e katërta AAK-PSD me 79 sosh.

Sidoqoftë, vlen të theksohet se ky numërim i sontëm që zgjati për gati 1 orë, ishte i fundit dhe tani pritet që KQZ-ja të certifikojë rezultatet.

Ndryshe, këto vota të fundit të diasporës u numëruan me vendim të Gjykatës Supreme, pasi KQZ dhe PZAP kishin vendosur fillimisht të mos i numëronin, me arsyetimin se kishin ardhur me vonesë./Reporteri.net