Lidhja Demokratike e Kosovës dhe Lëvizja Vetëvendosje mund të arrijnë marrëveshje që ta ndajnë edhe pozitën e presidentit, por kjo nuk do të garantonte se kjo pikë do të zbatohej.

Dhe arsye për këtë janë votat. Një aktgjykim i vitit 2011 i Gjykatës Kushtetuese rreth zgjedhjes se presidentit thekson se në momentin e votimit të tij në Kuvend, prezent duhet të jenë 2/3 e deputetëve, që i bie duhet të jenë 80. Këtë gjë e ka konfirmuar edhe Armend Muja, analist politik, duke e theksuar se është problem të llogaritet me votat e tanishme. Ai këtë e theksoi në Debat Plus në Dukagjini TV, transmeton reporteri.net.

VV dhe LDK kanë 57 vota bashkë dhe me mbështetjen e minoriteteve i bëjnë 67.

Nëse e marrin në koalicion edhe Listen Serbe arrijnë 77 vota, që do të ishin të pamjaftueshme për ta zgjedhur presidentin.

Zgjedhja e tij do të ndodhte vetëm nëse koalicioni do të siguronte votat e dikujt nga opozita për ta bërë kuorumin e kërkuar prej 80 votave.