Kosova nuk ka pasur rezultate të mira në vlerësimin ndërkombëtar të nxënësve i njohur si PISA 2018.

Vendi ynë është renditur i treti nga fundi në garën ku morën pjesë 79 shtete duke lënë mbrapa vetëm Republikën Dominikane dhe Filipinet.

Sipas rezultateve që maten me indeksin e mesatares së OECD, nxënësit kosovarë kanë arritur 353 pikë në lexim, 366 në matematikë dhe 365 në shkencë.

Lidhur me këtë rezultat ka reaguar edhe zëvendësministri në Ministrinë e Punëve të Brendshme, Isa Xhemajlaj, shkruan Reporteri.net.

Ai ka thënë se ky dështim është rezultat i emërimit të njerëzve të pakualifikuar nëpër postet kyçe në shkolla, nga drejtori e deri te arsimtarët. Mirëpo në përpjekje për të kritikuar sistemin arsimor, Xhemajlaj i ka bërë vetë masakër gjuhës shqipe.

Në pak rreshta, ai ka bërë gabime të shumta, duke mos arritur ta dallojë njëjësin me shumësin. Vendosja e saktë e shkronjës “ë” me sa duket është një sfidë vërtetë e vështirë për zëvendësministrin kosovar. /Reporteri.net