Policia e Kosovës ka suspenduar dy policë për incidentin që ka ndodhur në diskotekën “Duplex” gjatë muajit të kaluar.

Inspektorati Policor i Kosovës  përmes një komunikate ka njoftuar se ka rekomanduar suspendimin e  policëve me inicialet G.P dhe I.H, shkruan Reporteri.net.

Në njoftimin e IPK-së bëhet e ditur se dy zyrtarët policorë të Njësive të Specializuara (NJSO – Njësitit Special Operativ), ishin afër vendit ngjarjes gjatë plagosjes që ndodhi në diskotekën Duplex.

Kjo është vërtetuar pasi janë analizuar informacionet dhe disa video-incizime që janë siguruar nga kamerat e sigurisë në vendin e incidentit.

Kujtojmë se gjatë javës së kaluar, policia ka arritur të arrestojë edhe dy persona të dyshuar për plagosjen e cila ka ndodhur mesnatën e 9 nëntorit në “Duplex”, ndërkohë që i dyshuari kryesor, Astrit Mehmeti, i njohur si “Llepota” vazhdon të jetë në arrati.

Kujtojmë se në këtë incident janë përdorur armë dhe ka pasur rrahje, si pasojë e të cilave 4 persona kanë kërkuar ndihmë mjekësore në QKUK.  /Reporteri.net