Në mbledhjen e 8 të jashtëzakonshme të qeverisë lidhur me situatën e krijuar pas tërmetit, kryeministri Edi Rama doli me dy propozime për banorët e zonave rurale që kanë mbetur të pastrehë.

Ai tha se për ata në fshat opsioni më i thjeshtë është rindërtimi i shtëpive si janë, kurse opsioni më pak i thjeshtë por më optimal sipas tij do të ishte një rikonfigurim i banimit.

“Për ata në fshat opsioni më i thjeshtë është rindërtimi i shtëpive si janë. Opsioni më pak i thjeshtë por më optimal do të ishte një rikonfigurim i banimit. Nëse do të arrinim të kishim një mirëkuptim me banorët që toka e tyre të vihet e gjitha në shërbim të ekonomisë së tyre rurale dhe banimi të grumbullohet si në një fshat normal në një vend normal do të ishte më e lehtë për ne dhe për ta në të ardhmen. Por kjo mbase është një rruge që atyre mund tu duket e komplikuar dhe nuk e di sesi do të shkojë. Por ne edhe për këtë do të marrim të gjitha masat”, ka deklaruar Rama.