Brenda mandatit qeverisës Qeveria e Albin Kurtit, tek pjesa e programit për politikat sociale, ka paraparë edhe përmasimin e gjendjes së familjeve me fëmijë.

Në programin për periudhën 2020-2023, të miratuar të premten, në mbledhjen e Qeverisë së Kosovës, ekzekutivi i Kurtit parasheh që familjet që kanë fëmijë deri në moshën 2 vjeçare, për 24 muaj do të marrin nga 20 Euro në muaj.

Pastaj, ato familje, do të marrin nga 10 Euro në muaj për fëmijët e tyre, deri kur ata të arrijnë moshën 16 vjeçare, shkruan Reporteri.net.

“Qeveria do të aplikojë zbatimin e shtesave të fëmijëve dhe kthimet tatimore sipas kësaj ndarje: Familjet që kanë fëmijë deri në moshën 2 vjeçare (24 muajt e parë) do të marrin njëzetë (20) Euro në muaj, pastaj deri në moshën 16 vjeçare do marrin dhjetë (10) euro në muaj”, thuhet në programin qeverisës ku flitet për përmirësimin e gjendjes së familjeve me fëmijë.

Tutje, aty parashihen edhe kthimet tatimore.

“Familjet me fëmijë deri në moshën 16-vjecare do të rimbursohen në këtë mënyrë: 150 euro në vit për familjet me të ardhura vjetore nën 5000 euro; 100 euro në vit për familjet me të ardhura vajtore nën 6000 euro; 50 euro në vit për familjet me të ardhura vjetore deri në 7000 euro”, parasheh programi katër vjeçar Qeverisës i koalicionit LDK-VV. /Reporteri.net/.