Dikur flamurin e Kosovës e quante lara-lara, por sot Albin Kurti këtë flamur po e mban në zyre dhe po e nderon kur intonohet himni, madje edhe po shpenzon qindra euro për të blerë flamuj të rinj të shtetit të Kosovës.

Albin Kurti tash e më shumë se një muaj është bërë kryeministër i Kosovës.

Ai detyrën e shefit të qeverisë e mori pasi partia e tij, Lëvizja Vetëvendosje doli e para në zgjedhjet e fundit që u mbajtën më 6 tetor 2019. Në qeverisje Kurtri është në koalicion me Lidhjen Demokratike të Kosovës, të drejtuar nga Isa Mustafa.

E para se të vinte në pushtet, Kurti kishte vlerësime krejt të ndryshme me të sotmet, si për partnerin e koalicionit ashtu edhe për flamurin e shtetit, shkruan FaktePlus.

“Nuk mund të ecim më këtë flamur lara-lara përpara”, kjo është fjalia që më së shumti e ka përdorur Albin Kurtri, sa ishte në opozitë dhe sa ishte vetëm kryetar i Vetëvendosjes.

Mirëpo, më të marrë pozitën e shefit të qeverisë Albin Kurti ka ndryshuar. Ai këtë flamur e ka vendosur në zyrë dhe po e përfaqëson shtetin dhe veten me këtë flamur.

E për këtë flamur Albin Kurti tashmë ka vendosur edhe të shpenzojë para.

Zyra e Kryeministrit gjatë ditës së djeshme ka shpallur edhe tender për blerjen e disa flamujve dhe shtizave.

Tenderi që ka shpallë zyra e Kurtit është “Furnizim me flamuj dhe shtiza flamujsh”.

Vlera e kësaj kontrate është 984 euro. Furnizimin me këto produkte do ta bëjë kompania “BLENDI”, me të cilën edhe është nënshkruar kontrata me datën 05.03.2020.