Dita e djeshme rezultoi të jetë ditë e keqe për Kosovën, pasi që dolën pozitivë 79 raste nga Komuna të ndryshme të vendit, teksa pas shtimit të numrit të infektuarve me koronavirus ka reaguar edhe Kryeparlamentarja Vjosa Osmani

E njejta ka kërkuar nga qytetarët e Kosovës që të qëndrojnë në shtëpi dhe t’i ndjekin udhëzimet e profesionistëve.

“24-orëshi i fundit shënoi numrin më të madh të të infektuarve të konfirmuar me Covid-19, gjithsej 79. Ky numër tregon fuqinë e armikut të padukshëm, dëshmon se, nëse ne, sikur thonë profesionistët shëndetësorë, ne i japim këmbë atij, ia bartim atë tjetrit, beteja ndaj tij do të jetë e gjatë dhe e dhimbshme”, ka shkruar në Facebook Osmani.

Kryetarja e kuvendit ka bërë thirrje që qytetarët të bëhen bashkë për ta ndaluar atë.

“ Prandaj, të bëhemi të gjithë bashkë për ta ndalur atë, për të shpëtuar jetët tona e të të dashurve tanë; t’i kufizojmë liritë tona sot që t’i gëzojmë përherë pastaj; ta kuptojmë se fatin e betejës e kemi në duart tona dhe se vetëm duke qëndruar në shtëpi dhe duke i ndjekur udhëzimet e profesionistëve, mund ta fitojmë atë. Së bashku mund t’ia dalim”, ka shkruar ajo.