Lidhja Demokratike e Kosovës nuk do ta përkrahë pakon emergjente të propozuar nga PDK-ja në seancën e nesërme.

Kështu u shpreh për KP, shefi i Grupit parlamentar të LDK-së, Arben Gashi. Derisa dy partitë tjera opozitare, AAK dhe Nisma-AKR thanë se do të votojnë pro kësaj pakoje në vlerë prej 320 milionë eurosh.

Deputeti i LDK-së thotë se propozimi i PDK-së është vetëm një projekt-rezolutë dhe nuk është obliguese për Qeverinë në detyrë.

“Në formën siç është nuk e përkrahim”, u shpreh Gashi për KP-në, transmeton KOHA.

Përkrahje pakos 320 milionëshe të propozuar nga PDK-ja për t’u ballafaquar me krizën pandemike i dha shefi i Grupit parlamentar të AAK-së, Daut Haradinaj.

Ai tha për KP se në këtë pako janë të përfshira edhe pikat e partisë së tij.

Ndërsa, shefi i Grupit parlamentar të Nisma-AKR, Haxhi Shala u shpreh se janë të informuar për këtë pako dhe se do të koordinohen me PDK-në brenda seancës së nesërme.

Tashmë Qeveria në detyrë ka miratuar Pakon emergjente në vlerë 170.6 milionë euro, por sipas PDK-së kjo nuk është e mjaftueshme. Gjatë ditës së sotme kryetari i PDK-së, Kadri Veseli dhe nënkryetari Shaqir Totaj, u bënë thirrje partive politike ta votojnë pakon prej 320 milionë eurosh.