Fidan Aliti ka qenë i ftuari i radhës në faqen zyrtare të Telegrafi Sport.

Mbrojtësi i Përfaqësueses së Kosovës ka folur rreth karrierës së tij, ku në vitin e tij të parë me Kalmarin ka shkëlqyer.

Aliti është përfolur edhe për një transferim të mundshëm në Serie A, ose në Superligën e Turqisë.

Se ka pasur interesime nga këto dy kampionate e ka konfirmuar vet mbrojtësi qendror për Telegrafin në Instagram.

“Është e vërtetë që ka pasur interesime në janar, por vendosa të qëndroj në Kalmar”.

“Ka pasur interesime nga Superliga e Turqisë, por edhe nga një klub i Serie A. A ishte Atalanta? Jo, jo nuk ka qenë Atalanta, ka qenë një skuadër tjetër, por në fund nuk ishte oferta e duhur”, deklaroi Aliti për Telegrafin.

26-vjeçari megjithatë thotë se është i gatshëm të largohet në verë nga Kalmari, nëse vije një ofertë e mirë për të dhe klubin.

“Unë tani jam 26-vjeçar dhe duhet të mendoj mirë para se të bëjë një hap të radhës”.

“Jam gati për tu larguar në verë, por duhet të vije oferta e duhur si për mua ashtu edhe për Kalmarin”, u shpreh mbrojtësi kosovar.

Aliti në 33 ndeshje sa ka zhvilluar me skuadrën suedeze në vitin e tij të parë ka shkëlqyer me katër gola e katër asistime.

Ai e ka vlerësuar periudhën te Kalmari si më të mirën në karrierën e tij në aspektin individual.