Kryeministri në detyrë, Albin Kurti, nuk do të dalë sot në zyrë pasi ka pasur kontakt me një person që dyshohet të jetë prekur me coronavirus.

Këtë gjë e ka konfirmuar vetë kryeministri, duke thënë se janë marrë mostrat e zyrtarit të dyshuar dhe po priten rezultaten, shkruan Reporteri.net.

Kryeministri ka thënë se është futur në vetizolim derisa të dalin rezultatet për zyrtarin që po dyshohet të ketë pasur kontakt me një të infektuar.

Postimi i plotë:

Të dashur qytetarë,

Sot është dita e parë kur nuk do të dal në punë në Kryeministri (ZKM). Një zyrtar i Ministrisë së Integrimeve Evropiane (MIE) ka pasur kontakt të ngushtë me një nga personat e dalur pozitiv në testin për COVID-19. Janë marrë mostrat dhe po presim rezultatin.

Unë kam pasur kontakt me të, sikurse edhe punonjës të tjerë në MIE e ZKM, ndonëse gjithnjë duke respektuar rregullat për distancën fizike. Nga sot jam në vetizolim në banesë gjersa të dalin rezultatet e testimit për zyrtarin nga MIE.

Do t’i kryejmë detyrat nga largësia me përkushtimin e njëjtë, do t’i marrim vendimet e duhura me përgjegjësinë e njëjtë.