Kryetari i AKR-së, Behgjet Pacolli, konsideron se deklaratat dhe spekulimet ndaj vendimit të radhës së Gjykatës Kushtetuese duhet të ndalen, në veçanti nga presidenti Thaçi dhe kryeministri në detyrë Kurti.

“Gjykata Kushtetuese është një organ i lartë dhe i pavarur dhe nuk guxon të kërcënohet apo të ndikohet nga askush”, shkruan Pacolli.

Pacolli ka ftuar që të respektohet vendimi i Kushtetueses, cilido qoftë ai, si dhe e ka marrë vetën e tij shembull sa ishte President i vendit si e kishte respektuar vendimin e Gjykatës Kushtetuese.

Postimi i tij i plotë:

Shoh shumë deklarata dhe spekulime politike nga të gjitha anët, në lidhje me vendimin e radhës të Gjykatës Kushtetuese. Kjo duhet të ndalet. Kjo vlen për të gjitha palët që tentojnë të ndikojnë, veçanërisht për Presidentin dhe Kryeministrin në detyrë. Gjykata Kushtetuese është një organ i lartë dhe i pavarur dhe nuk guxon të kërcënohet apo të ndikohet nga askush. Është tepër e rëndësishme që të respektohet pa marrë parasysh cili do të jetë vendimi. Unë, si President i vendit, e pata bëra këtë pa zhurmë fare. Ky shembull duhet të ndiqet edhe nga të tjerët.