Një edukatore e çerdhes “Xixëllonjat” në Prishtinë është testuar sot për të parë nëse është prekur me COVID-19. Kryetari i Komunës, Shpend Ahmeti, tha se do të testohen të gjithë fëmijët e atyre klasave.

Mbrëmjen e së dielës u konfirmuan 10 raste të reja me Coronavirus në Prishtinë, në mesin e të cilëve edhe dy fëmijë të dy çerdheve në Prishtinë.

I pari i kryeqytetit informoi se kana mbyllur çerdhen “Xixëllonjat” për shkak se burri i një edukatore ka dalë pozitiv me Coronavirus.

“Për shkak të kujdesit ne kemi vendosur t’i mbyllim çerdhet dhe nesër do të testohen të gjithë fëmijët e atyre klasave. Për shkak se dy fëmijë kanë rezultuar pozitiv kemi vendosur t’i mbyllim, çerdhja ‘Xixëllonja’ është mbyllur për shkak se burri i një edukatore ka dalë pozitiv dhe nëse edukatorja del negative atëherë fillon puna, por ajo shkon në vetizolim. Deri më tani nuk mendojmë se ka nevojë për masa të tjera”, tha Ahmeti.

“…në momentin kur i kemi dezinfektuar klasat dhe ata fëmijë që kanë qenë në trup me ata dy fëmijë që kanë dalë pozitiv nuk do të shkojnë në çerdhe dhe edukatoret nuk do të shkojnë në punë. Në qoftë se del testimi i edukatores në çerdhen ‘Xixëllonja’ çerdhja hapet por ajo shkon në izolim”, ka shtuar Ahmeti

Dje kanë rezultuar me COVID-19 gjithsej 40 persona.

Deri më tani numri i të prekurve në vend ka arritur 1234, me gjithsej 890 të shëruar dhe 31 viktima.

Kryetari i komunës së Prishtinës, Shpend Ahmeti ka thënë se momentalisht në Prishtinë janë 31 raste aktive dhe 10 prej tyre priten të shërohen gjatë këtyre ditëve.

Ahmeti ka thënë se faza e tretë e rihapjes ka bërë që të rritet edhe numri i të infektuarve.

Por sipas tij, deri tani situata është në kontroll.

“Deri më sot i kemi 106 raste në Prishtinë dhe momentalisht janë 31 raste aktive, 10 prej tyre pritet të shërohen ditëve në vazhdim. Ne me lehtësimin e masave kemi prit që të rriten numrat e rasteve me COVID-19 por ideja është që këtë ta kemi në mënyrë të kontrolluara dhe mos të kthehemi prapa me masat. Këto raste në Prishtinë kanë të bëjnë me një person i cili ka pasur shumë kontakte”, tha Ahmeti.