Presidenti i Republikës së Kosovës, Hashim Thaçi, ka marrë vendim që  zgjedhjet e jashtëzakonshme në Mitrovicën e Veriut të shtyhen, shkruan Reporteri.net.  Ky vendim i presidentit Thaçi është bërë me qëllim që të parandalimit të përhapjes së Coronavirusit.

Një burim i Reporteri.net thotë se zgjedhjet shtyhen në një afat të pacaktuar.

“Me qëllim të parandalimit të përhapjes së COVID-19 dhe parandalimit të rritjes së numrit të personave të infektuar në Republikën e Kosovës si dhe ruajtjes së shëndetit publik, zgjedhjet e jashtëzakonshme për kryetar të Komunës së Mitrovicës së Veriut, pas dorëheqjes së kryetarit të kësaj komune, shtyhen për një afat të pacaktuar”, ka bërë me dije ky burim.

Mitrovica e Veriut do të shkojë në zgjedhje të jashtëzakonshme pas kryetari i deritanishëm, Goran Rakiq është emëruar zv.kryeministër dhe Ministër i Pushtetit Lokal në Qeverinë Hoti. Për shkak të kësaj, në Veri do duhej të mbaheshin zgjedhjet e jashtëzakonshme për kryetar.

Ende nuk është vendosur edhe për mbajtjen e zgjedhjeve në komunën e Podujevës të cilat janë shtyrë për shkak të pandemisë së Coronavirusit.  Kryetari i kësaj komune, Agim Veliu ishte zgjedhur më 3 shkurt të këtij viti, ministër i Punëve të Brendshme në Qeverinë Kurti.