Shefja e zyrës së BE-së në Kosovë, Natalyia Apostolova ka reaguar pas dështimit të votimit të pesë marrëveshjeve ndërkombëtare nga Kuvendi i Kosovës.

Apostolova ka shkruar në Twitter se është zhgënjyese që këto marrëveshje nuk arritën të ratifikohen në Kuvendin e Kosovës.

“E zhgënjyer me dështimin e Kuvendit sot për ratifikimin e disa marrëveshjeve ndërkombëtare, përfshirë pjesëmarrjen e Kosovës në programet e BE-së, Fiskalis 2020 dhe Customs 2020, duke privuar taksat dhe doganat e Kosovës nga modernizimi i punës së tyre dhe shkëmbimi i njohurive me kolegët në BE dhe më gjerë”, ka shkruar Apostolova.

Marrëveshjet ndërkombëtare që dështuan të miratoheshin dje në Kuvend janë:

1. Shqyrtimi i Projektligjit për ratifikimin e Marrëveshjes për financim ndërmjet Republikës së Kosovës dhe Asociacionit Ndërkombëtar për Zhvillim për Projektin e Fuqizimit të Sektorit Financiar.

2. Shqyrtimi i Projektligjit për ratifikimin e Marrëveshjes për Hua ndërmjet Republikës së Kosovës dhe Bankës Evropiane për Rindërtim dhe Zhvillim për Projektin e Zhvillimit të Ujërave të Zeza në Gjilan.

3. Shqyrtimi i Projektligjit për ratifikimin e Marrëveshjes për Financimin e Projektit për Kadastër të Patundshmërisë dhe Infrastrukturë Gjeohapësinore ndërmjet Republikës së Kosovës dhe Asociacionit Ndërkombëtar për Zhvillim.

4. Shqyrtimi i Projektligjit për ratifikimin e Marrëveshjes ndërmjet Bashkimit Evropian dhe Republikës së Kosovës mbi Pjesëmarrjen e Kosovës në Programin e Bashkimit ‘Dogana 2020’.

5. Shqyrtimi i Projektligjit për ratifikimin e Marrëveshjes ndërmjet Bashkimit Evropian dhe Republikës së Kosovës mbi Pjesëmarrjen e Kosovës në Programin e Bashkimit “Fiskalis 2020”.