Në Tiranë punonjësit e transportit urban protestuan sërish sot para ministrisë së Transportit.

Ata deklarojnë se nuk do të kthehen në punë nëse nuk marrin një tjetër bonus financiar prej 40 mijë lekësh si dhe heqjen e përgjegjësisë nga ana e tyre për mos zbatim të protokollit për parandalimin e koronavirusit.

Për ta kontrolli I pasagjerëve për zbatimin e protokollit është i pamundur.

Policia ka ndërhyrë për të shpërndarë protestën dhe janë shoqëruar mbi 15 persona për shkak se ndalohet grumbullimi për të parandaluar përhapjen e koronavirusit.

Punonjësit e transportit urban janë prej 4 muajsh pa punë dhe kanë marrë vetëm një bonus prej 40 mijë lekësh, dhe kërkojnë që të marrin dhe një tjetër bonus për të përballuar jetesën deri në korrik kur të marrin pagën e parë.

“Duhet të hiqet përgjegjësia nga fatorinoja dhe shoferi për mos zbatim të protokollit dhe të rimbursohemi me 40 mijë lekë të tjera”

Përfaqësuesit e shoqatës së transportit kërkojnë lehtësira fiskale.