Ministri i Punëve të Brendshme, Agim Veliu, është takuar sot me Ministrin e Shëndetësisë, Armend Zemajn dhe Drejtorin e Përgjithshëm të Policisë së Kosovës, për të diskutuar lidhur me situatën epidemiologjike në vend.

Përmes një komunikate drejtuar mediave, MPB-ja ka bërë me dije se në këtë takim është biseduar rreth koordinimit të aktiviteteve për zbatimin e vendimeve të Qeverisë së Kosovës në menaxhimin e situatës me COVID 19.

“Gjatë takimit u vlerësua e ka një trend të mirë të zbatimit të masave nga ana e qytetarëve dhe bizneseve, që ka ndikuar direkt në numrin më të vogël të qytetarëve të infektuar. Po ashtu u vlerësua puna e shkëlqyer e Policisë së Kosovës, si institucion i zbatimit të ligjit, në zbatimin e masave të Qeverisë së Kosovës dhe u kërkua njëkohësisht nga të gjithë qytetarët që të vazhdojnë të respektojnë rekomandimet e Institucioneve të Kosovës”, thuhet në komunikatë.