Kryeministri i Kosovës, Avdullah Hoti, ka pritur sot kryetarin e Bashkësisë Islame të Kosovës Naim Tërnava, me të cilin bëhet e ditur se bisedoi për gjendjen aktuale në vend, si dhe për prioritetet e Qeverisë së Kosovës, sidomos për përpjekjet e menaxhimit të pandemisë Covid 19 dhe për pakon e rimëkëmbjes ekonomike.

Në këtë takim, po ashtu, njoftohet se është bisedua edhe për proceset e tjera të rëndësishme nëpër të cilat po kalon vendi, duke përfshirë edhe dialogun e ndërmjetësuar nga Bashkimi Evropian për normalizimin e marrëdhënieve me Serbinë, që duhet të përfundojë me njohjen reciproke në mes të dyja vendeve.

Në njoftim thuhet se Hoti e falënderoi Tërnavën dhe Bashkësisë Islame të Kosovës për rolin e kësaj bashkësie dhe të bashkësive të tjera fetare, duke theksuar se bashkëjetesa dhe harmonia ndërmjet besimeve të ndryshme ka qenë përherë një vlerë e veçantë e popullit të Kosovës./Reporteri.net/.