Mazhoranca është e gatshme për çdo datë nga 15 prilli deri në 15 maj për zhvillimin e zgjedhjeve, me përjashtim të një dite.

Kreu i qeverisë, Edi Rama zhvilloi një takim të shkurtër me Presidentin Ilir Meta në presidencë ku i ka komunikuar propozimin e PS. Në fund të takimit Rama nuk u prononcua për mediat.

News 24 raporton se burime brenda takimit bëjnë me dije se kryeministri Rama është shprehur i hapur për çdo datë, por ka kërkuar të shmanget data 2 maj. Kjo për arsye se në këtë datë janë Pashkët Ortodokse.

Ndërkaq presidenti Meta ka vijuar sot takimet prej orës 9:30 me përfaqësues të partive politike. Ata kanë deklaruar se data 18 prill është e përshtatshme për mbajtjen e zgjedhjeve.

Në orën 12:00 në presidencë pritet të mbërrijë kreu i opozitës, Lulzim Basha për t’i shprehur presidentit alternativën e PD për datën e zgjedhjeve.