Lideri i Vetëvendosjes, Albin Kurti, ka përkujtuar 30-vjetorin e Kushtetutës së Kaçanikut.

Sipas Kurtit, edhe pse është lënë në harresë nga pushtetet e deritanishme, duhet të kujtohen me krenari e respekt delegatët nënshkrues.

“Kushtetuta e Republikës së Kosovës ishte rrjedhimi i logjikshëm politik i 111 delegatëve votues dhe 114 delegatëve nënshkrues të Deklaratës Kushtetuese më 2 korrik 1990, të cilët nën kërcënimin e tytave të armëve të policisë serbe, njëzëri dhe të bashkuar nënshkruan aktin e parë legal e legjitim të vetëvendosjes politike të kombit shqiptar në ish-Jugosllavi. Sot, edhe pse të lënë në harresë nga pushtetet e deritanishme, me krenari e respekt kujtomë delegatët nënshkrues, të gjallë dhe ata në përjetësi”, shkruan Kurti në një postim në “Facebook”.

Ai ka vlerësuar këtë Kushtetutë si gurthemel të shtetësisë së Kosovës dhe triumf i legjitimitetit popullor të vullnetit të lirë qytetar mbi legalitetin shtypës të Serbisë.

“Ky vullnet i lirë i dhe i ligjshëm u rilegjitimua me referendumin për Republikën e Kosovës si shtet sovran e i pavarur më 30 shtator 1991 dhe u kurorëzua me luftën çlirimtare të popullit shqiptar të organizuar e udhëhequr nga UÇK-ja për çlirimin e Republikës së Kosovës nga okupimi e sundimi serb më 12 qershor 1999”, shkruan Kurti.