Avdullah Hoti, këtë të enjte është paraqitur para Komisionit për Punë të Jashtme të Bashkimit Evropian.

Ai para kësaj trupe ka raportuar gjerë e gjatë për gjendjen në Kosovë, bisedimet me Serbinë e marrëveshjet e Uashingtonit.

Hoti ka kërkuar që Kosovës ti liberalizohen vizat, duke shtuar se janë të përkushtuar në integrimet evropiane.

Po në këtë takim e pranishme ishte edhe përfaqësuesja e për Kosovën në Parlamentin Evropian, Viola Von Cramon.

Ajo ka dhënë një intervistë për televizionin T7.

Von Cramon, duke folur për procesin e liberalizimit të vizave ajo ka thënë se këtë proces po e bllokon Franca.

Sipas saj, lufta për integritet, transparencë e kundër korrupsionit do ndihmonte në ndryshimin e qasjes së francezëve për këtë temë.

Ndërsa marrëveshja e nënshkruar në Shtëpinë e Bardhë, sipas Von Cramon i ndihmon më shumë fushatës së Trump, sesa popullit të Kosovës.

Ndërkohë, qasjen e Grenellit ndaj Kosovës ajo e cilëson më shumë si polarizim i situatës.

Teksa thotë se dialogu duhet të udhëhiqet nga Bashkimi Evropian.

Viola Von Cramon, është emëruar raportuese për Kosovën pas zgjedhjeve të fundit për Parlamentin Evropian.