Një aksion ndërkombëtar anti-drogë është kryer këtë të enjte nga autoritetet shqiptare e italiane, të cilat kanë goditur një grup të strukturuar kriminal që trafikonte lëndë narkotike nga Ekuadori e më tutje në Shqipëri, Itali, Spanjë, Holandë e Dubai.

Sipas informacioneve paraprake, në pranga ka rënë dhe një ndër krerët e bandës. Fjala është për Denis Matoshin, i njohur ndryshe si Eldi Dizdari. Ky i fundit është arrestuar në Dubai për llogari të drejtësisë shqiptare.

Media italiane ndërkohë ka shkruar se janë kryer dhjetëra arrestime dhe janë sekuestruar miliona euro kokainë.

Në operacion janë përfshirë Eurojust, Europol, Anti-Mafia dhe Drejtoria Qëndrore e Policisë Kriminale.

Ndërkohë një aksion është kryer dhe në Vlorë nga SPAK, ku gjithashtu janë arrestuar të paktën 3 persona.