Kryeministri Avdullah Hoti ka thënë e ka përsëritur qëndrimin se Asociacioni i Komunave Serbe nuk do të ketë kompetenca ekzekutive, shkruan Reporteri.net.

Ai këtë deklaratë e ka bërë në një konferencë për media pak kohë pas takimit me emisarin e BE-së për dialogun Kosovë-Serbi, Miroslav Lajçak.

Kryeministri Hoti ka thënë se asociacioni është temë e mbyllur me marrëveshjen e vitit 2013 që është ratifikuar në Kuvendin e Kosovës, marrëveshjen e parimeve e vitit 2015 por edhe opinionin e Gjykatës Kushtetuese.

“E kemi mbështetjen dhe garancionin e partnerëve tanë se ky asociacion nuk do të ketë kompetenca ekzekutive. Kur kemi hyrë në proces të dialogut që e kemi hequr nga tavolina idenë e shkëmbimit të territoreve dhe e dyta që nuk diskutohet karakteri unitar i shtetit, që nënkupton nuk ka acoacion me kompetenca ekzekutive”, tha Hoti.

Ai është shprehur se nuk i nënshtrohet asnjë presioni.

“Nuk kam ndërruar mendje, gjithmonë e kam pasur këtë qëndrim nuk i nënshtrohem presioneve. Jam për ta kryer detyrën time në përputhje me interesat e vendit dhe Kushtetutën e Kosovës”, ka thënë ai./Reporteri.net