Kryetari i Kuvendit të Kosovës, Kadri Veseli do të jetë sërish nikoqir i një takimi të liderëve institucional e politikë të Kosovës.

Nesër, krerët e institucioneve, presidenti Hashim Thaçi, kryeministri Haradinaj, dhe anëtarët e Ekipit Negociator, Fatmir Limaj e Shpend Ahmeti do të jenë në zyrën e Kadri Veseli në Kuvendin e Kosovës.

Burimet e Reporteri.net, thonë se në këtë takim do të flitet për diskutimet e  zhvilluara në Samitin e Berlinit rreth dialogut mes Kosovës dhe Serbisë.

“Ka qenë iniciativë e zotit Veseli që t’i mbledhë liderët dhe Ekipin në një takim të përbashkët. Qëllimi është të ketë një koordinim institucion dhe me Ekipin Negociator. Aq më tepër për fazat e ardhshme të sjelljes së Kosovës në raport me dialogun si dhe për përfaqësimin në Samitin e Parisit që do të mbahet në korrik”, ka thënë ky burim.

Samiti i Berlinit nuk ka dhënë ndonjë rezultat konkret rreth dialogut, por u tha se i ka dhënë një dimension tjetër dialogut Kosovë – Serbi.

Taksa e vendosur nga Kosova po e mbanë ende peng dialogun. Pezullimin e saj po e kërkojnë Shtetet e Bashkuara të Amerikës, Gjermania dhe Franca.