Milani nuk ka arritur më shumë se një barazim 2-2 përballë Veronës në kuadër të xhiros së shtatë në Serie A.

Përkundër faktit se nuk fitoi, Milani vazhdon të mbetet kryesues në Itali dhe duket se ky fakt po e motivon Piolin.

Tekniku italian në prononcimin për “Sky Sport” pas ndeshjes, tha se angazhimi në dy kompeticione dhe ndeshjet e shpeshta po dalin të jenë faktorë determinues.

“Jemi të angazhuar edhe në Europa Ligë. Kur luan në mesjavë dhe kthehesh, kuptohet se nuk e ke të lehtë përballë skuadrave si Udinese e Verona. Sa i përket Ibrahimovic, ai ishte goxha i inatosur me faktin se nuk fituam, por tha se i duhet pushim.

“Ajo që duhet punuar është mënyra sesi pranuam pesë gola në dy takimet e fundit. S’e kemi të lehtë, por do të punojmë shumë që të vazhdojmë drejt objektivave”, tha mes tjerash shefi i shtabit teknik te banka “kuq e zi”.