Pas konfirmimit të aktakuzës ndaj Hashim Thaçit nga Gjykata Speciale, dhe dorëheqjes së tij nga pozita e presidentit, kryekuvendarja Vjosa Osmani, mori detyrën e ushtrueses së presidentes, deri në zgjedhjen e presidentit të ri.

Por deputetja e PDK-së, Ganimete Musliu, thotë se nuk do të dëshironte ta shihte asnjë grua të Kosovës në pozitën e Osmanit.

“Është në një situatë që s’dua ta shoh asnjë grua të Kosovës. E ka betejën e hapur me Qeverinë e Kosovës, marrëdhënia e saj në njërën anë me qeverinë, dhe karrierën e saj politike qe dy dekada e ka ndërtuar duke share e fyer figurën e presidentit Thaçi. Dhe në një situate të tillë, të gjithë do të mund ta menaxhonin situatën përveç Vjosa Osmanit”, ka deklaruar Musliu në REPORTERI/INTERVISTA.

Sipas saj, Osmani përveç sharjes ndaj Thaçit nuk ka pasur asnjë rezultat konkret, apo ndonjë strategji e vendim.

“Kushtetuta e rregullon çështjen e Presidentit. Nuk është meritë e Vjosa Osmanit pse është aty, deri diku mund të jetë se i ka kontribuar me propagandë e fyerje”, ka thënë Musliu.

Ajo ka thënë se për partinë e saj nuk është e rëndësishme kush do të ulet në karrigen e Presidentit, pasi fokusin e kanë tek zhvillimet e fundit që ndodhën, ku krerët e UÇK-së u dërguan në Hagë.

/Reporteri.net/.