Chelsea ia doli të triumfojë 0-2 në transfertën ndaj Newcastle dhe të marrë përkohësisht kreun e renditjes me 18 pikë në 9 javë, aq sa ka edhe Leicester që do të luajë nesër në “Anfield Road” ndaj Liverpoolit.

Londinezët e Lampard dominuan sfidën e zhvilluar në “St’ James Park” dhe arritën të gjejnë golin e avantazhit që në minutën e 10’, kur pas një topi të hedhur rrezikshëm në zonë nga Timo Werner, ishte Fernandez që shënoi në portën e tij.

Më pas golin e sigurisë e shënoi sulmuesi i ri i talentuar, Tammy Abraham, që u shërbye saktë nga Werner në minutën e 65-të dhe vulosi suksesin e Chelseat, me londinezët që regjistrojnë kështu fitoren e pestë në 9 javë kampionat.