Policia e ka ndaluar që të hyjë në Kosovë zyrtarin serb nga zyra e ashtuquajtur për Kosovën në Qeverinë e Serbisë, Milorad Arlov.

Kështu është raportuar në portalin Kosovo Online ku thuhet se Arlov është ndalur në vendkalimin kufitar në Jarinje.

Pas këtij ndalimi ka reaguar e ashtuquajtura zyrë për Kosovën në Qeverinë e Serbisë.

Aty thuhet se Arlov po vinte në Kosovë për të shpërndarë 1 mijë pako me dhurata për fëmijët si dhe gjashtë bursa.

“Vendimet e tyre politike dhe masat e paarsyeshme tani kanë prekur banorët më të rinj të Kosovës, të cilët do të privohen nga momentet e gëzimit dhe dhuratat e festave, sepse autoritetet e Prishtinës kanë filluar të lajnë llogaritë me paketat e Vitit të Ri,” thuhet në deklaratën e autoriteteve të Serbisë.

Pak ditë më parë në veri të vendit por edhe në disa vendbanime me shumicë serbe ka qëndruar edhe djali i presidentit serb, Aleksandër Vuciq.