Presidenti i Kosovës, Hashim Thaçi nuk ka marrë pjesë në drekën e përbashkët me liderët e Ballkanit Perëndimor.

Në këtë drekë kanë marrë pjesë presidenti shqiptar, Ilir Meta, presidenti serb Aleksandër Vuçiç, ai i Bosnjës Milorad Dodik si dhe liderë tjerë, pjesëmarrës në Samitin Brdo-Brijuni, transmeton Reporteri.net.

Presidenti Thaçi ka sqaruar pse nuk ka marrë pjesë në drekën e Metës.

”Ishte me tepër respekt teknik. Por të njëjtën kohë të takohesha me dy presidentët që nuk e kanë njohur Kosovën e të përsëriteshin gjërat e njëjta në të folur, ishte e kot. Do të ishte i panevojshëm një vazhdim i një debati krejt të kotë. Bosnja e Hercegovina ende nuk e ka njohur Kosovën, mban pozicion nganjëherë më të ashpër sesa vet Serbia. Ky ishte edhe qëndrimi im si pozicion i mosshkuarjes time në Sarajevë, ishte mesazh qortues ndaj Dodik për qëndrimin e Bosnjës në raport me Kosovën”, tha Thaçi në Opinion të TV Klan, kur u pyet pse refuzoi të merrte pjesë në drekë, shkruan Reporteri.net.

Gjatë ditës Thaçi kishte refuzuar të ia shtrijë dorën Dodikut, derisa dje kishte kritikuar presidentin Meta pse ai i kishte bërë ftesë Dodikut për të ardhur në Tiranë.

Ndërkohë, sot pas takimit, presidenti Thaçi kishte pranuar se ka pasur mospajtime me presidentin Vuçiq, pasi ky i fundit kishte mohuar krimet serbe. /Reporteri.net/.