Si pasojë e vërshimeve pas reshjeve të shumta në Kosovë në dy ditët e fundit, rruga që lidh fshatin Rud të Malishevës me fshatin Sferkë të Klinës është shkatërruar tërësisht.

Komuna e Malishevës ka thënë se rruga është dëmtuar rëndë dhe është tërësisht e pakalueshme. Në fotografi shihet gjendja e rëndë e shkaktuar pas vërshimeve. Aty shihet se rruga është këputur e asfalti është larguar në tërësi, shkruan Reporteri.net.

Mirëpo, pamje të tilla nuk po i shohim këto ditë vetëm në Kosovë. Në gjendje hiç më të mirë nuk janë as disa rrugë në Shqipëri.

Reshjet intensive të ditëve të fundit kanë shembur një rrugë në Lezhë. Raportohet se rruga e shembur është rruga që lidh Njësinë Administrative të Ungrenjit me qytetin e Lezhës.

Siç shihet në pamje, rruga është ndarë në dy pjesë, për shkak të rrëshqitjes së dherave. Për pasojë qarkullimi është ndërprerë.

Në gjendje të tillë janë edhe disa rrugë në Borsh. /Reporteri.net