Me anë të një avioni ushtarak është kthyer në Itali trupi i pajetë i ambasadorit Luca Attanasio dhe i bodigardit të tij Vittorio Iacovacci. Arkivolet e tyre ishin mbuluar me flamurin italian dhe nesër do të zhvillohen ceremonitë përkujtimore dhe homazhet për dy të rënët në krye të detyrës në kryeqytetin e vendit, Romë.

Dy pjesëtarët e trupit diplomatik të Italisë në shtetin afrikan u sulmuan ndërkohë që ndodheshin në një automjet të forcave paqeruajtëse të OKB dhe ndërruan jetë pak orë më pas në njësinë spitalore të ngritur nga OKB në rajon. Ministria e Brendshme e Kongos ka fajësuar për ngjarjen një grup rebelësh të quajtur “Forcat Demokratike për Çlirimin e Ruandas”, i cili është vetëm një prej 120 grupesh militare aktive në zonë.

Shteti italian ka kërkuar një hetim ndërkombëtar për gjetjen e fajtorëve dhe vendosjen e tyre përpara drejtësisë.