Gjendja shëndetësore e ish-presidentit të Kosovës, Fatmir Sejdiu po vazhdon të jetë stabile. Pas infektimit me COVID-19, ai po merr trajtim mjekësor në Klinikën Infektive në QKUK.

Ish-presidenti i Kosovës, Fatmir Sejdiu ditë më parë është infektuar me koronavirus, raporton Gazeta Express.

Për shkak të infektimit me këtë virus, atij i është dashur të kërkojë trajtim mjekësor në Klinikën Infektive në Qendrën Klinike Universitare të Kosovës.

Punëtorë shëndetësorë në këtë klinikë kanë treguar për Express se Sejdiu po vazhdon të jetë i shtrirë aty.

Një nga infektologët ka treguar se gjendja e tij është e mirë dhe stabile.

Nga kjo klinikë kanë thënë se Sejdiut nuk i është rënduar deri tani gjendja shëndetësore për shkak të virusit.

“Gjendja e tij është e mirë është stabile. Nuk ju ka rënduar deri tani gjendja”, është thënë për gazetën.

Kujtojmë që numri i rasteve të infektuara me COVID-19 po vazhdon të rritet në vend, kësisoj edhe institucionet publike shëndetësore po mbushen edhe më shumë me pacientë.

Vetëm sot, Shërbimi Spitalor Klinik e Universitar i Kosovës ka bërë të ditur se 917 pacientë janë të shtrirë në klinikat ku po trajtohen pacientët me COVID-19 dhe në spitalet rajonale.