Policia e Elbasanit në vijim të operacionit të koduar “Krasta 2021” ka vënë në pranga shtetasin Ardi Çekani, i cili fshihej në ambientet e banesës së shtetasit Ardian Çopja.

Sipas njoftimit të policisë, Çekani ishte person në kërkim, i dënuar me 1 vit e 6 muaj për veprën penale “Dhuna në familje”, “Kundërshtimi i punonjësit të policisë së rendit publik” dhe “Veprime në kundërshtim me vendimin e gjykatës”.

Në momentin e arrestimit, këtij shtetasi iu gjet dhe një sasi e vogël lëndë narkotike kanabis.

Gjithashtu, gjatë kontrollit të banesës së 53-vjecarit Çopja, shërbimet e Policisë gjetën dhe sekuestruan edhe 5 radio dhe disa uniforma të ngjashme me ato të Policisë.

Mëngjesin e djeshëm, më 29 mars RENEA në bashkëpunim me policinë Elbasan finalizuan operacionin policor të koduar “Krasta 2021”, në kuadër të të cilit u vu në pranga Ardian Çopja, i dyshuar si një nga autorët e një vrasjeje të dyfishtë të ndodhur në vitin 2012.

Në banesën e tij, në momentin e kapjes, Policia gjeti dhe sekuestroi një armë zjarri kallashnikov.

Policia vijon operacionin për kapjen e personit të shpallur në kërkim Florenc Çapja.