Ramush Haradinaj në facebook ka njoftuar se deputetët e partisë së tij nuk do të marrin pjesë në votimin e Presidentit.

Ai ka dhënë edhe arsyet e tij për këtë.

Ndërkohë, ky qëndrim i AAK-së ka ardhur pas reagimeve të ambasadave të shteteve mike të Kosovës, perfshirë edhe asaj të SHBA-ve në Prishtinë, të cilat kanë kerkuar prezencë të të gjithë deputetëve në sallë gjatë votimit të Presidentit të ri.

“Aleanca për Ardhmërinë e Kosovës, ka dhënë me kohë qëndrimet rreth çështjes së zgjedhjes së Presidentit. Ne jemi kundër koncentrimit të pushtetit te një person apo parti politike, sepse kjo i bën dëm demokracisë në dobi të vendosjes së autoritarizmit. Shembull për këtë ishte tentimi i mbrëmshëm për marrjen e vendimit ad-hoc për ndryshim të ligjit zgjedhor, duke e kontrabanduar në Kuvend, me arrogancë numrash e shantazhe. Andaj, deputetët e Aleancës, nuk do të marrin pjesë në seancën e thirrur të Kuvendit për votimin e Presidentit”, ka shkruar kryetari dhe deputeti i AAK’së, Ramush Haradinaj, në facebook.