Opinionistja e njohur, Kimete Berisha ka reaguar pasi presidentja e vendit, Vjosa Osmani është bërë e ditur që është në mesin e mbi 50 mijë personave që gjatë vikendit kanë shkuar në Shqipëri.

Përmes një shkrimi në llogarinë e saj në Facebook, ajo tha se derisa populli ka mbetur pa vaksina “presidentja po rrezitet”.

“Është e para dhe e vetmja Presidente në botë që shkon për të pushuar në bregdet ende pa ardhur pushimet, dhe që lodhet nga puna ende pa filluar punën. Qysh ka kohë Presidentja për t’u argëtuar kot kur populli i ‘saj’ është pa vaksina, i padisiplinuar dhe tash sallamadi, i kanë lënë edhe maskat!  Duhet të jesh i pagdhendur dhe iracional të bësh sikur çdo gjë është normale, kur asgjë, bash asgjë nuk është normale! S’është normale të bëhesh prijës i turistëve në pandemi.  Mjafton të shikosh CNN dhe kronikat nga India për ta parë ‘sa është ora’”, tha ajo.

“Ku njerëzit vdesin për oksigjen,  ku të vdekurit digjen masivisht në turra drush’,  ku të vdekurit i ‘ulin’ në motoçikleta e i çojnë në shtëpi;  ku populli qan e s’ka kush i përgjigjet;  ku i madh e i vogël lypin ndihmë, bota i sheh e i dëgkon, por askush s’mund ta ndihmojë. Se, PO, kësaj situate i përgjigjet vargu i Kur’anit për fundin e tregimit: ‘Vjen një ditë kur askush-askujt nuk mund t’i ndihmojë”, shkroi Berisha.