Policia e Kuçovës është vënë në kërkim të një 43-vjeçari, pasi plagosi me armë një tjetër person.

Policia bën me dije se ngjarja ka ndodhur sot rreth orës 16:45 në fshatin Fermë Partizani, Kuçovë.

Pas një konflikti për motive të dobëta shtetasi E.P, 43 vjeç, banues në Kuçovë, ka plagosur me armë zjarri në këmbë shtetasin D.B, 32 vjeç.

I plagosuri është transportuar në Spitalin Rajonal të Beratit dhe është jashtë rrezikut për jetën.

Grupi hetimor dhe shërbimet e policisë po punojnë për zbardhjen e rrethanave të ngjarjes si dhe kapjen e autorit.