Kryetari i Kuvendit të Serbisë, Ivica Daçiq tha se duke paralajmëruar padi kundër Serbisë për gjenocid, Kosova po përpiqet ta “vendosë temën e dialogut në plan të dytë”.

Daçiq tha në TV Pink se njoftime të tilla vijnë nga Prishtina para çdo raundi të dialogut në Bruksel.

“Është një përpjekje për të thënë që ka parakushte për të folur rreth dialogut. Reparacionet e luftës, një proces gjyqësor për gjenocid dhe përdhunime të pretenduara në Kosovë, që ka qenë gjithmonë rasti sa herë që bisedimet do të fillonin në Bruksel”, tha Daçiq.

Ai i quajti “qesharake” paralajmërimet e kryeministrit të Kosovës, Albin Kurti.

“Nëse ata do të kishin bazë ligjore, ata do ta kishin ngritur padinë shumë kohë më parë”, tha Daçiq.

Ai shtoi se Serbia po përballet me “ditë të vështira” sepse, siç shtoi ai, “ka presion të kondensuar nga palë të ndryshme”.