Deputetja nga radhët e PDK-së, Ganimete Musliu ka parashtruar pyetje për Ministrin e Mbrojtjes, Armend Mehaj, i cili nuk ka qenë prezent në seancën që po mbahet në Kuvendin e Kosovës.

Ajo ka thënë se Mehaj ka munguar edhe në seancën e kaluar, andaj pyetjet do t’ia drejtojë deri sa ai të përgjigjet.

“Çështja është te veshja e uniformës së bashkëshortit të presidentes gjatë ushtrimit të FSK-së ‘Defender 21’. Çfarë grade ushtarake mban bashkëshorti i Presidentes, si rezervist në sa trajnime ka marrë pjesë dhe kur i ka mbajtur ato? Nga kush është ftuar të marrë pjesë? Nëse është ftuar si bashkëshorti i Presidentes, atëherë pse është veshur në uniformën e FSK-së? Nëse është ftuar si ushtarak, pse është fotografuar afër Gjeneralit të FSK-së pasi që këtë nuk ia lejon grada ushtarake?”, ka thënë Musliu.

Ajo ka thënë se duhet të pyetet edhe Presidentja Vjosa Osmani nëse ka lejuar shkeljen e protokollit të FSK-së.