Deputeti i PDK-së, Bekim Haxhiu, ka thënë se deputetët e VV-së kanë votuar kundër në këtë komision dhe sipas tij, nuk u kanë mundësuar qasjen në verifikimin e kontratës për vaksina me Pfizer.

Haxhiu në Facebook shkroi se jotransparenca e Qeverisë Kurti dhe vota kundër e tyre shton dyshimet për keqpërdorime dhe për vërtetësinë e deklaratave të Qeverisë dhe Ministrisë së Shëndetësisë.

Postimi i tij i plotë:

Sot në mbledhjen e Komisionit Parlamentar për Shëndetësi dhe Mirëqenie Sociale, propozova që të kemi qasje në kontratën e Qeverisë të lidhur me Pfizer.

Kërkesa ime u hodh në votim, mirëpo deputetët e LVV votuan kundër dhe nuk e mundësuan qasjen e anëtarëve të  Komsionit Parlamentar për Shëndetësi në verifikimin e kontratës me Pfizer.

Kosova është vendi i fundit në Evropë në procesin e vaksinimit  dhe deri me sot ka pranuar vetëm vaksina të dhuruara donacion nga COVAX, BE dhe vendet mike.

Jo transparenca e Qeverisë së Kosovës dhe vota kundër e deputetve të LVV-së, në Komision, shton dyshimet për keqpërdorime dhe për vërtetësinë e deklaratave të Qeverisë dhe MSH.

Përse nuk u lejohet anëtarëve të Komisionit Parlamentar për Shëndetësi qasja në kontratën e lidhur me Pfizer?Çfarë po fshihet pas kësaj kontrate?

A është ky edhe një mashtrim i radhës?